Support de
WACC
[Taking side]

Rasin o, rasin

Gen yon ti pyebwa nan lide m ki anvi grandi, men ki poko pouse, bò kote yon pil rasin ansyen palmis ki byen chita sou lonbrik pouri  jeneral Tousen, anba plenn lapenn byen laj tè ansyen restavèk yo…

Yon ti pyebwa k poko pouse, men ki deja gen konprann, yon ti pyebwa k pa gen pòtvwa, men k renmen kale zòrèy li ba silans.

Nan koute koute, yon bon jou, li tande yon vwa k ap plenyen : 
 « Rasin o, rasin o, leve non.
Pou tann dat n ap jèmen, li lè atò pou n ta kanpe.
Leve non, leve non
kanpe non, kanpe non
epi pouse pouse n byen drèt….

Pa kite, pa kite pyès pousyè otowout
pa kite, pa kite pousyè pyès bèl wout
tounen bèl plak pe dyòl sou memwa nou
pa kite, pa kite laplas twò bèl twòp
pou palto mizisyen rara tout plimay
nan kanaval toutis mal maske yo
anba tonnèl, nan gwo lekòl oubyen nan gran lakou
pa vin tiye lanp sou je klere pèsonn ankò.

Epi pa bliye, pa bliye
se te nan koze ipokrit karesan
yo te blayi kò nou atè nan fredite
lè yo te fin fè li kwè nan miwa malè kache
se li ki te pi bèl pyebwa nwa ki te genyen…

Sispann mare sotiz nou
 ak pa kavalye pòlka peyi lalin ak zetwal yo
sispann lagè ak pwòp tèt nou an
ositou retire tout ponya nou deja foure
tout epe nou deja antre nan do pwòp fòs nou
epi monte monte n byen wo
pou kabrit move zè pa jwenn fèy nou ankò
nan kase kouvri tout vye lòbèy yo gen kont nou
paske se sitirè ki ba vòlè lafòs pou l kontinye
ou kwè n tande…

Monte, men kite Desalin nou monte nou pafwa
benyen, men benyen ak lonbrik nou byen kachte
pou ankenn vye dlo pa vin fè larivyè welele
desann nan konsyans nou jodi a
jouktan pou n ta gen pou n tann
anpil lòt tan ankò anvan n fin netwaye
labou sou tout branch nou
tout kote, nan tout sans
pou libète finalman sa rive fè djandjan
toutbon vre nan fondas nou tout bò lakay… »

                                                            Nounous.

Retour à la liste des documents